Språkrådet
Skrivemåten av dette ordet er ikkje normert av Språkrådet, men det finst nedfelte retningslinjer for korleis importord skal få norsk skrivemåte (6). Eit viktig prinsipp er overføringa av språklydar til skrift. Mykje tyder på at ordet blir uttalt med ein e-lyd blant norsk helsepersonell. Ei overføring av denne uttalen talar for at ordet bør skrivast nevus på norsk, ikkje nævus eller naevus. Om vi søkjer blant tekstar som er klassifiserte som «medisin og helse» i Nasjonalbibliotekets base, ser vi også ei overvekt av skrivemåten nevus (7). Skrivemåten i kodeverka ICD-10 og ICPC-2 er òg nevus (8). Fleirtalsforma blir nevusar (bokmål: nevuser).
Skrivemåten nevus føyer seg fint inn i ordlagingsmønster som t.d. melanocyttnevus, pigmentnevus og stjernenevus, med tilhøyrande fleirtalsbøyingar melanocyttnevusar, pigmentnevusar og stjernenevusar. I latinske samansetjingar, som til dømes nevus sanguineus, er det naturleg å nytte den latinske fleirtalsbøyinga, nevi sanguinei.
Skrivemåten ser vi òg i fleire andre tilsvarande ord frå latin, til dømes praesens/præsens og faeces/fæces. Slike ord har gått igjennom same lydendring, noko som har gjeve oss skrivemåtane presens og feces.
I omsetjinga av terminologien SNOMED CT til norsk har vi lagt oss så tett opp til skrivemåtar i Tidsskriftet som mogleg (9, 10). I den norske versjonen av SNOMED CT har vi valt nevus som den føretrekte skrivemåten og med nævus som søkbart synonym. Det er i takt med norsk medisinsk fagspråk i dag.